Follow Us

آج کا دن کیسا رہے گا

تازہ ترین خبریں

عمران خان کی شہباز گل سے ملاقات کی کوشش رائیگاں

 اسلام آباد: پاکستان تحریک اںصاف (پی ٹی آئی) کے چیئرمین عمران خان کو پمز اسپتال میں اپنے چیف آف اسٹاف شہباز گل سے ملنے کی اجازت نہیں مل سکی۔ 

عمران خان کی اسپتال آمد سے قبل ہی سیکیورٹی کے سخت انتظامات کردیے گئے اور وہ اسپتال کے کارڈیالوجی وارڈ کے بیرونی احاطے میں شہباز گل سے ملاقات کے لیے انتظار کرتے رہے۔

تفصیلات کے مطابق اسلام آباد پولیس نے سابق وزیراعطم کو شہباز گل سے ملنے کی اجازت نہیں دی اور انہیں کہا گیا کہ گل سے ملاقات کے لیے عدالت سے اجازت نامہ حاصل کیا جائے۔

بعدازاں عمران خان نے میڈیا سے مختصر گفتگو کرتے ہوئے کہا کہ عدالتی احکامات کے باوجود اسلام آباد پولیس نے شہباز گل سے ملاقات کی اجازت نہیں دی، کل (بروز ہفتہ) اسلام آباد میں شہباز گل کے لیے ریلی نکال رہا ہوں۔

انہوں نے کہا کہ پولیس کو کہاں سے احکامات مل رہے ہیں کیا انہیں عدالتی احکامات کی فکر نہیں ہے، یہاں قانون کی حکمرانی ہے یا ڈنڈے کی۔